Big Bang

Vikidia(e)tik
Hona jo: nabigazioa, bilatu
Unibertsoa nola zabaltzen den erakusten duen animazioa.

Big Bang (Eztanda Handia) delakoa unibertsoa nola sortu zen azaltzeko gaur egun dagoen teoriarik onartuena da. Teoria honen arabera, unibertsoko materia guztia puntu bakar batean bilduta zegoen, baina duela 15 mila milioi (15.000.000.000) urte inguru, eztanda egin zuen eta materia hori unibertsoan zehar zabaldu eta sakabanatu zen, milioika eta milioika zatitan. Geroago, zati horiek pixkanaka-pixkanaka multzotan bilduz joan ziren; horietatik sortu ziren galaxiak, izarrak eta planeta-sistemak.

Zientzialariek uste dute unibertsoa oraindik zabaltzen ari dela, eta, geroari begira, bi iritzi edo hipotesi daude: baten arabera, unibertsoak etengabe jarraituko du zabaltzen; bestearen arabera, ordea, unibertsoaren hedapen hori noizbait bukatu egingo da eta, bertan dauden astro edo gorputz guztiek duten erakartze-indarraren ondorioz, astro horiek berriro ere puntu batean bilduko dira.